BUNGE LAOMBOLEZA KIFO CHA SPIKA MSTAAFU WA BUNGE LA TISA MAREHEMU SAMUEL SITTA

Spika wa Bunge la Jamhuri ya Muungano wa Tanzania Mheshimiwa Job Yustino Ndugai amesema kuwa amepokea kwa masikitiko makubwa taarifa za kifo cha Spika Mstaafu wa Bunge la Tisa (2005-2010) na Mbunge Mstaafu wa Jimbo la Urambo lililopo Mkoani Tabora Mhe. Samuel John Sitta kilichotokea leo tarehe 7 Novemba, 2016 katika hospitali ya Technical University of Munich nchini Ujerumani alikokuwa akipatiwa matibabu.

Kupitia taarifa yake iliyotolewa na Mwenyekiti wa Bunge Mhe Azzan Mussa Zungu kabla ya kuanza kwa kipindi cha Maswali na Majibu , Mhe Spika amesema Mhe Sitta aliondoka nchini tarehe 3 Novemba, 2016 na alikuwa nchini Ujerumani kwa ajili ya matibabu zaidi ambayo Bunge la Jamhuri ya Muungano wa Tanzania lilikuwa inayagharamia.

“Waheshimiwa Wabunge, kwa niaba yenu natoa pole nyingi kwa Familia hususan kwa Mbunge mwenzetu Mhe Margareth Simwanza Sitta (Mb) wa Jimbo la Urambo ambaye ameondokewa na Mumewe,” alisema Mhe Spika kupitia taarifa yake.

Pia Mhe Spika kupitia taarifa yake hiyo amewaeleza Waheshimiwa Wabunge kwamba Ofisi ya Bunge itaendelea kuwapa taarifa zaidi kuhusu msiba huu kadri itakavyokuwa inaendelea kuzipokea.

Kufutia taarifa hiyo kwa Wabunge, Bunge limetoa heshima zake kwa Spika Mstaafu Mhe Samuel Sitta kwa Wabunge wote kusimama kwa dakika moja kuomboleza kifo chake.

Aidha mara baada ya kipindi cha  Maswali na Majibu, Kamati ya Uongozi ilikutana kwa dharura ili kujadili kuhusu hoja ya kuahirisha Bunge kufuatia msiba huo ambapo Kikao hicho kiliridhia Bunge liahirishwe ili Waheshimiwa Wabunge wapate muda wa kuomboleza.

Marehemu Samuel John Sitta enzi za uhai wake akiongoza kikao cha Bunge akiwa kama Spika wa Bunge la Tisa (2005-2010).